Norski markvörðurinn Lars Ivar Moldskred hefur samið við KR út leiktíðina.

Moldskred (f. 12. nóvember 1978) er Vestlendingur og lék upphaflega með Tjørvåg IL og síðan Bergsøy IL á sínum heimaslóðum.

Árið 2000 gekk hann til liðs við IL Hødd. Ári síðar vakti hann fyrst athygli á landsvísu þegar Hødd (þá í næst efstu deild) sló margfalda meistara Rosenborg út í bikarnum eftir vítakeppni. Moldskred varði tvær spyrnur í vítakeppninni.

Moldskred lék 142 deildarleiki með Hødd og skoraði eitt mark, með skoti úr eigin vítateig í 7-0 sigri á Lørenskog árið 2002. Hann átti auk þess seinna á ferlinum eitt sláarskot eftir langt útspark.

Árið 2004 gekk hann til liðs við Molde, fór þaðan til Lillestrøm árið 2007 en í fyrra lék hann 26 leiki með Strømsgodset í úrvalsdeildinni. Í vetur stefndi í að hann færi til úrvalsdeildarfélagsins Kongsvinger IL en félagið valdi Thomas Myhre, fyrrum landsliðsmarkmann, í staðinn.

Á heimasíðu NISO (samtök íþróttamanna) lýsir Moldskred sínum helstu kostum: Góður einn á móti einum, góðar staðsetningar, stjórna vörninni vel, viljugur til að æfa og "prófessjónal", fljótur að koma boltanum í leik, "markmannstýpan" og óhræddur.