Seinnihluta janúarmánaðar eru fyrirhugaðar framkvæmdir á KR-svæðinu þar sem til stendur að reisa fjölnota íþróttamannvirki. Fyrsti áfangi framkvæmdanna felst í jarðvegsskiptum á svæðinu og er áætlað að fjarlægja þurfi um 21.000 rúmmetra af jarðvegi.

Við flutning jarðvegsins af framkvæmdasvæðinu verður umferð þungabifreiða um Kaplaskjólsveg og Flyðrugranda. Til að tryggja öryggi barna og annarra vegfarenda verður gönguleið með fram Flyðrugranda því lokuð gangandi vegfarendum á kafla. Lokunin nær yfir hluta gönguleiðarinnar með fram Flyðrugranda, frá norðurenda KR-svæðisins og suður að gatnamótum Flyðrugranda og Meistaravalla.

Gerð verður tímabundin hjáleið með fram gervigrasvellinum til að tryggja ungum iðkendum öruggt og gott aðgengi að KR-svæðinu meðan á framkvæmdunum stendur. Reiknað er með að jarðvinna á svæðinu hefjist í lok janúar og standi fram í sumarbyrjun.

Í öryggisskyni viljum við biðja ykkur um að upplýsa börn og önnur ungmenni um þessar lokanir.