Sjö KR-sundmenn kepptu á CUBE-móti SH í Hafnarfirði um helgina og áttu saman mjög gott mót. Alls skiluðu þau 16 bætingum. Bríet Björk bætti sig í fjórum greinum. Í 50 m skriðsundi synti hún sig jafnframt undir lágmörkum á ÍM, stór áfangi! Róbert Einvarður bætti sig í þremur greinum og vann silfur í 200 m bringusundi. Sérstaklega stórar bætingar komu hjá honum í 200 m fjórsundi og 200 m bringusundi. Emilý Sóley bætti sig í þremur greinum og vann brons í 100 m flugsundi. Tíminn hennar í 200 m bringusundi skipar henni nú í 4. sæti meðal 14 ára KR-stúlkna frá upphafi, og í 100 m flugsundi er hún í 6. sæti. Bragi Valur bætti sig í öllum þremur greinum sínum, Eygló Appoline bætti sig mikið í 100 m fjórsundi og Inga Aniela bætti sig í bæði 100 m skriðsundi og 100 m flugsundi og synti auk þess sitt fyrsta skráða 400 m fjórsund. Mjög gaman að sjá svona margar bætingar og góðan árangur hjá hópnum. Til hamingju öll sömul!

A- sveit KR vann C-flokk (8 ára og yngri) Íslandsmóts barna- og unglingasveita í skák sem fram fór sunnudaginn 18. nóvember. Í sveitinni voru: Jón Fenrir Ragnarsson, Dalmar Bragi Aronsson, Theodór Nóel Schram, og Ari Hrafn Briem. KR vann einnig C-flokkinn fyrir ári síðan. Í B-flokki (9-12 ára) lenti A-sveit KR í 2. sæti og í A-flokk (13-16 ára) lenti A -sveit KR í 4. sæti.  Samtals tefldu 39 krakkar úr KR á Íslandsmóti barna- og unglingasveita í 9 sveitum. Tæplega helmingur af öllum iðkendum í Skákdeild KR tefldi á Íslandsmóti barna- og unglingasveita.