KNATTSPYRNA

Knattspyrnudeild KR hefur stofnað til samstarfs við Field Masters Academy, knattspyrnuakademíu í Accra í Gana. Markmið samstarfsins er að styðja við menntun og knattspyrnuiðkun ungra leikmanna, jafnframt því að skapa raunhæfan vettvang fyrir efnilega leikmenn til að stíga sín fyrstu skref í Evrópu. Samstarfssamningur var undirritaður í nýafstaðinni ferð fulltrúa KR til Gana. Field Masters Academy leggur ríka áherslu á skipulagt starf með ungum og efnilegum leikmönnum, bæði hvað varðar knattspyrnu og menntun. Frá akademíunni hafa komið leikmenn sem síðar hafa leikið á Englandi, í Danmörku, á Spáni og í Portúgal. Hluti samstarfsins felst í því að þjálfarar akademíunnar og KR munu eiga í virku samstarfi. Þar á meðal verða heimsóknir til KR þar sem þjálfarar kynnast áherslum félagsins í þjálfun og leikfræði. Þá mun KR einnig koma að því að bæta aðstæður til menntunar og knattspyrnuiðkunar í Gana. Með verkefninu styður KR við mikilvæga starfsemi sem veitir ungum leikmönnum raunhæfan vettvang til skipulagðs íþróttastarfs og skapar tækifæri fyrir þá að elta drauminn um atvinnumennsku í Evrópu. Magnús Orri M. Schram, formaður knattspyrnudeildar KR: „Við hjá KR hlökkum mikið til samstarfsins við Field Masters Academy. Við á Íslandi erum framarlega á mörgum sviðum knattspyrnunnar og með þessu samstarfi getum við miðlað reynslu okkar áfram. Um leið opnum við tækifæri fyrir leikmenn frá Gana til að koma til Íslands og taka þátt í æfingum og keppni. Á næstu dögum munu fyrstu tveir leikmennirnir koma til KR og það er mikilvægt að við tökum vel á móti þeim og styðjum þá í að taka fyrstu skrefin í nýju landi.“

Hér að neðan eru niðurstöður happdrættis á jólakvöldi knattspyrnudeildar frá því á föstudaginn. Vinninga má nálgast á skrifstofu framkvæmdarstjóra knattspyrnudeildar. Vonandi var heppnin með þér!  Vinningaskrá

Aldís Ylfa Heimisdóttir landsliðsþjálfari U17 kvenna, hefur valið Köru Guðmundsdóttur og Rakel Grétarsdóttur í leikmannahóp sem tekur þátt í æfingamóti sem verður haldið í Porto, Portúgal dagana 26. til 30.september.  Til hamingju stelpur og gangi ykkur vel!!

Ómar Ingi Guðmundsson, landsliðsþjálfari U16 karla, hefur valið Tristan Gauta Línberg Arnórsson í leikmannahóp sem tekur þátt í æfingamóti í Finnlandi dagana 23.-26. september. Ísland mætir þar Eistlandi, Finnlandi og Norður-Írlandi! Til hamingju Tristan Gauti og gangi þér vel!!

Í kvöld, 8. september kl. 20:00 er kynningarfundur fyrir 2. flokk kvenna í fótbolta. Allar stelpur fæddar 2007, 2008 og 2009 eru velkomnar. Þjálfari flokksins er Guðjón Kristinsson. Fundurinn verður haldinn í félagsheimili KR. Vonandi sjáum við sem flestar stelpur! Foreldrar og forráðamenn eru að sjálfsögðu velkomin líka. Áfram KR!

Aldís Ylfa Heimisdóttir, landsliðsþjálfari U16 kvenna, hefur valið Rögnu Láru Ragnarsdóttur á landsliðsæfingar dagana 8.-10. september. Gangi þér vel Ragna Lára!!

Aldís Ylfa Heimisdóttir, landsliðsþjálfari U17 kvenna, hefur valið Köru Guðmundsdóttur, Matthildi Eygló Þórarinsdóttur og Rakel Grétarsdóttur á landsliðsæfingar dagana 8.-10. september. Gangi ykkur vel stelpur!!

Ólafur Ingi Skúlason, landsliðsþjálfari U21 karla, hefur valið Halldór Snæ Georgsson, Galdur Guðmundsson og Júlíus Mar Júlíusson í hóp sem mætir Færeyjum og Eistlandi í undankeppni EM 2027. Leikirnir eru fyrstu leikir liðsins í undankeppninni. Ísland mætir Færeyjum á Þróttarvelli fimmtudaginn 4. september og hefst sá leikur kl. 17:00. Liðið fer svo til Eistlands og mætir þar heimamönnum mánudaginn 8. september í Tallin. Gangi ykkur vel strákar!

Knattspyrnudeild KR lætur gott af sér leiða með styrktarleik til stuðnings Gigtarfélagi Íslands. Leikurinn fer fram á Meistaravöllum fimmtudaginn 28. ágúst þar sem kvennalið KR spilar við Hauka og styrkir Gigtarfélagið um leið. Gigtarfélag Íslands vinnur ötult starf við að bæta lífsgæði gigtarsjúklinga, stuðla að fræðslu og styðja við félagsfólk og aðstandendur. Gigtarsjúkdómar geta hrjáð fólk á öllum aldri, ekki einungis eldra fólk, en 75% gigtarsjúklinga eru konur. Kvennalið KR leggur málefninu lið til að efla umræðuna og safna styrktarfé sem rennur beint til Gigtarfélagsins. Leggðu okkur lið Leikmenn KR munu spila í sérstökum viðhafnarkeppnisbúningi sem hefur verið hannaður sérstaklega fyrir tilefnið. Búningurinn verður einnig til sölu í takmörkuðu upplagi fyrir leikinn. Allur ágóði sölunnar og miðasölu á leikinn mun renna til Gigtarfélags Íslands.